Katika tukio lililowashangaza wengi na kuvunja ukimya wa muda mrefu, Rais Samia Suluhu Hassan alitoa kauli kali isiyo na kificho wakati wa harambee ya kuchangia watoto wenye mahitaji maalum wa Kanisa la Kilutheri. Akiwa amesimama mbele ya viongozi wa dini, wanasiasa, na waumini, Rais Samia alivunja mipaka ya kawaida ya hotuba za kitaifa, akitoa kauli nzito dhidi ya Askofu Josephat Gwajima – akisema bayana kwamba “huyu si mtumishi wa Mungu, bali ni mtumishi wa Shetani.” Kauli hiyo ilisababisha mshangao na ukimya wa ghafla ukitanda ukumbini, kabla ya kusikika minong’ono ya hofu na mshangao miongoni mwa waliokuwepo.
Kauli hiyo ya Rais Samia imeibua mjadala mkubwa nchini Tanzania, hasa ikizingatiwa historia ya Gwajima kama mmoja wa viongozi wa kiroho wenye ushawishi mkubwa kisiasa, na ambaye kwa muda mrefu amekuwa akijipambanua kama sauti ya upinzani dhidi ya baadhi ya sera za serikali, hata akiwa mbunge wa chama tawala. Wakati baadhi ya waumini na wanasiasa wamesema Rais amethubutu kusema ukweli ambao wengi wamekuwa wakiogopa kuusema hadharani, wengine wanaiona kauli hiyo kama hatari kwa uhuru wa imani na uhuru wa maoni katika taifa linalojivunia demokrasia na kuheshimu tofauti za kiitikadi.
Tangu tukio hilo, majukwaa ya mitandao ya kijamii yamejaa maoni mchanganyiko: wengine wakimsifu Rais kwa “kutetea utakatifu wa madhabahu”, huku wengine wakihofia kuwa taifa linaelekea kwenye mgongano wa wazi kati ya mamlaka ya serikali na taasisi za kidini. Wakati huo huo, Gwajima mwenyewe hajajibu hadharani tuhuma hizo, lakini mashabiki wake wameshika kasi wakisema vita hii “sio ya damu na nyama, bali ya kiroho.” Ikiwa ni mwanzo wa sura mpya ya uhusiano kati ya dini na dola, basi ni wazi: upepo umeanza kubadilika.
